ថៃ៖ ភ្លើងគប់កីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ បានទៅដល់ទីក្រុងបាងកក ប្រទេសថៃ នៅល្ងាចថ្ងៃទី១៥ ខែមេសា ឆ្នាំ២០២៣។ ភ្លើងគប់នឹងបន្តដង្ហែនៅទីក្រុងបាងកក នៅថ្ងៃទី១៧ ខែមេសា ឆ្នាំ២០២៣។
ពិធីដង្ហែ អគ្គិជ័យកីឡា និងភ្លើងគប់កីឡាស៊ីហ្គេម-អាស៊ានប៉ារ៉ាហ្គេមជុំវិញបណ្តាប្រទេសអាស៊ាន គឺដឹកនាំដោយរដ្ឋលេខាធិការក្រសួងទេសចរណ៍ លោក ហោ សារុន។
ភ្លើងគប់កីឡា បានដង្ហែដល់ប្រទេសថៃ ដែលជាប្រទេសទី៦ បន្ទាប់ពីប្រទេសម៉ាឡេស៊ី ទីម័រខាងកើត ឥណ្ឌូណេស៊ី ហ្វីលីពីន វៀតណាម។ ភ្លើងគប់កីឡា នឹងបន្តឆ្ពោះទៅប្រទេស សិង្ហបុរី មីយ៉ាន់ម៉ា និងឡាវ រួចហើយនឹងបន្តមកកម្ពុជាវិញនៅថ្ងៃទី២៧ ខែមេសា ឆ្នាំ២០២៣ ដោយដង្ហែជុំវិញបឹងទន្លេសាបមុនឡើងមកដល់ពហុកីឡដ្ឋានជាតិមរតកតេជោ នៅថ្ងៃទី៥ ខែឧសភា ឆ្នាំ២០២៣ ដែលជាថ្ងៃបើកការប្រកួតកីឡាស៊ីហ្គេម-ប៉ារ៉ាហ្គេម។
នៅសល់តែ ១៩ថ្ងៃទៀតប៉ុណ្ណោះ គិតត្រឹមថ្ងៃទី១៦ ខែមេសា ឆ្នាំ២០២៣ ព្រឹត្តិការណ៍ស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ដែលកម្ពុជាធ្វើជាម្ចាស់ផ្ទះក្នុងឆ្នាំ២០២៣ នឹងឈានមកដល់ហើយ៕
